You've Got Mail (1998)

http://moviereviewland.blogspot.com

අද කියන්න යන You've got mail චිත්‍රපටිය මම බලපු හොඳම චිත්‍රපටියක්. ඒ වගේම නැවත නැවතත් බලමින් බොහොම පුංචි තැන් සියල්ලම උකහාගන්න උත්සාහ කරමින් රසවිඳපු චිත්‍රපටියක්. මගේ ලකුණු දීමේ ක්‍රමය අනුව 9/10ක් මට දෙන්න පුළුවන් ඒ නිසා. ඔය ලකුණු දීම ඇත්තටම චිත්‍රපටියෙ තියෙන සිනමාත්මක දේවල් වලට වඩා චිත්‍රපටිය මට දැණෙන විධිය මත පදනම් වුණ එකක් නිසා සමහර විට මේක ඔයාලට දිරවන එකක් නෙවෙයිනම් සමාවෙන්න ඕන.

මේක මුලින්ම මට හමුවුණේ හොඳටම සවුත්තු වෙලා තිබුණ VCD තැටි දෙකකින් 2004දි විතර. ඒක බලන්න බැරිම තැන මම youtube එකේ මේක ගැන හෙව්වා. ඒකෙ තිබුණා කොටස් වශයෙන් මුළු චිත්‍රපටියම. ඒ දවස්වල ටොරන්ට්, mkv හොයාගන්න තරම් දැණුමක් නොතිබුණ නිසා මම ඔය youtube කෑලි ‍ටික බාලා හෙණ කට්ටක් කාලා එකට මාට්ටු කරලා චිත්‍රපටිය ආයෙම හැදුවා... ඒක සෑහෙන්න කාලයක් බැලුවා... පස්සෙ කාලෙක නම් මට ටොරන්ට් එකක් හම්බ වුණා.

චිත්‍රපටියට හිත යන්නෙ කරුණු කීපයක් නිසා. එක මේක ප්‍රේම කතාවක් වීම. දෙක ‍ඒ ප්‍රේම කතාව ඔන්ලයින් හමුවන යුවලක් අතර ඇතිවෙන පෙම් පලහිලව්වක් සම්බන්ධව වීම. තුන්වන එක තමයි චිත්‍රපටිය පුරාම වගේ පොත්පත් ගැන කතා කිරීම. අනිත් වැදගත්ම එක තමයි රඟපාන නළු නිළි යුවල. මම හිතන්නෙ Tom Hanks ගැන නොදන්න, එයාට ආදරය නොකරන හොලිවුඩ් චිත්‍රපටි රසිකයෙක් ඉන්න විධියක් නෑ. ඒ තරමටම ටොම් හෑන්ක්ස් චිත්‍රපටි රසිකයන්ව තමන්ගෙ රඟපෑම්වලින් රසවත් කරපු නළුවෙක්. ඒ එක්කම Meg Ryan කියන්නෙත් මම බොහොම ආදරය කරන දක්ෂ හුරුබුහුටි නිලියක්! මේ දෙන්නාම ඉන්න මේ වගේම තවත් චිත්‍රපටියක් ගැන පස්සෙ කතා කරමු.

දැනට අපි කතා කරන්නෙ You've got mail ගැන. මේකෙ කතාව හරිම සුමටයි. ඒ වගේම නොදැනීම ගලාගෙන යන ෆැන්ටසික් ගතියක් චිත්‍රපටිය පුරාවටම තියෙනවා.

Joe Fox කියන්නෙ ධනවත් ව්‍යාපාරික පවුලකින් පැවතෙන දැවැන්ත පොත් ව්‍යාපාරිකයෙක්. ඔහු තමන්ගෙ පොත් සාප්පු ජාලයේ අළුත්ම ශාඛාව විවෘත කරනවා. ඒක නිසා ඒ සාප්පුව තියෙන පාර කෙලවරේම අතීතෙ ඉඳන් තිබුණ පාරම්පරික පුංචි පොත් කඩේ බංකොලොත් වෙලා වහන්න වෙනවා. ඒ කඩේ අයිතිකාර තරුණ ගෑණු ළමයට හෙවත් Kathleen Kellyට විකල්පයක් නැති වෙනවා. මේක නිසා කෙලී සහ ජෝ අතර ව්‍යාපාරික මතගැටුමක් ඇති වෙනවා. දෙන්නට දෙන්නා නයි වෛරයෙන් ඉන්නේ.

හැබැයි මේ දෙන්නා ඔන්ලයින් පෙම්වතුන් ඒ වෙද්දි. ඒක ඔවුන් ව්‍යාපාරිකයන් විධියට සැබෑවට අඳුනගන්න කලින් ඉඳන් පැවතෙන එකක්. ඒ පෙම් කතාවෙදි මේ දෙන්නා තරම් ගැලපෙන දෙන්නෙක් නැති තරම්. නමුත් දෙන්නම ඔන්ලයින් ඉන්නෙ වෙනත් නම් වලින් සහ දෙන්නම දෙන්නගෙ ඇත්ත තොරතුරු ඒ විධියටම ඔන්ලයින් කියන්න යන්නෙ නැති නිසා දෙන්නට දෙන්නා සැබෑ ලෝකෙදි පෙම්වතුන් විධියට අඳුනගන්නෙ නෑ. කැත්තට පොල්ල වගෙයි ඉන්නේ.

ඔය අතරෙ කැත්ලීන්ගෙ කඩේ වහන්න වීමත් එක්ක ඇය තමන්ගෙ ඔන්ලයින් පෙම්වතා වෙන ජෝගෙන් උදව් ඉල්ලනවා. ඔවුන් දෙදෙනා හමුවෙන්න තීරණය කරනවා. ඉතින් දවසක් යොදාගෙන ජෝ එනවා කැත්ලීන්ව බලන්න. ඇවිත් බැලින්නම් සැබෑ ලෝකෙදි තමන්ගෙ පරම තරහකාරි තමයි තමන්ගෙ ඔන්ලයින් ජීවි‍තේදි හොයාගත්තු පෙම්වතිය.

ඊට පස්සෙ අපිව එක එක පැති වලට ඇද දමමින්, සංවේදී කරමින් මේ කතාව අන්තිම දක්වා හරිම සුන්දර විධියට ගලාගෙන යනවා.

මම හිතන්නෙ ඔන්ලයින් ජීවිතයක් තියෙන අපි වගේ අයට වඩාත් සමීප චිත්‍රපටියක්! හැමෝම බලන්න.

මගේ ලකුණු - 9/10

දැනගන්න සහ බාගන්න

imdb

• Torrent
• Official site