Eat Pray Love කියන්නෙ මෑතකදි මම බලපු හොඳම කියල කියන්න පුළුවන් චිත්‍රපටියක්. ඒ හේතු කීපයක් නිසා. එකක් තමයි ජුලියා රොබර්ට්ස්. ඇගේ රඟපෑම්වලට විවාදයකින් තොරවම මම කැමති වෙන ගතියක් තියෙනවා. ඒක ඇයට තියෙන රංගනයේ නිරායාසාත්මක හැකියාව නිසා වෙන්න ඕන. චිත්‍රපටියට කැමති වෙන්න ඊළඟ හේතුව තමයි ඒ චිත්‍රපටිය බොහොම සුන්දර රූප පෙළක් වීම. ඇමරිකාව ඉතාලිය, ඉන්දියාව සහ ඉන්දුනීසියානු බාලි දූපත් ඇසුරේ රෑපගත කරල තියෙන චිත්‍රපටිය තුල තියෙන දර්ශන අපූරුයි. අනිත් කාරණය තමයි මෙහි Eat කොටසට අදාලව පෙන්නන ඉතාලි කෑම වර්ග. සාමාන්‍යයෙන් පෙරේතකමට කන මිනිස්සු නොවුණට රසේ එක එක විධි අත්විඳින්න කවුද කැමති නැත්තේ. ඉතිං කෑම ගැන පෙන්වන කොටස සුපිරි! අනිත් කරුණ මේකෙ ඉන්න ප්‍රධාන නළුවො කීප දෙනා ඒ තමයි James Franco, Billy Crudup, Richard Jenkins සහ Javier Bardem. එයිනුත් ජාවියර් රඟපාපු Sea Inside ගැන වෙන තැනකත් කලින් ලිව්වනේ.
කතාවෙ ප්‍රධාන චරිතය තමයි ලිස්. ඇය සංචාරය කරමින් ඒ ගැන ලියන ලේඛිකාවක්. ඇගේ විවාහය තුල ඇයට ඇයව අහිමිවීම නිසා ඇය ඉන්නෙ කනස්සල්ලෙන්. ඒ පීඩනයේ උපරිමයෙදි ඇය තීරණය කරනව දික්කසාද වෙන්න. පසුව ඇයට එයින් පලායන්න උවමනා නිසාම ඇය ඉතාලියට යනවා සියළු දේ පසෙක දමා. එහිදී විවිධ කෑම වර්ග එක්ක ගත කරන කාලය ඇගේ ජීවිතය පහසු කරවනවා. පසුව ඉන්දියාවෙදි යාඥා මගින් ඇය ගිලිහුණු ඇගේ ආත්ම විශ්වාසය ගොඩනගාගන්නවා. අන්තිමේ බාලි දූපත් වලදි ඇයට නැවත ආදරය හමුවෙන්නෙ ඇය පුහුණු කරන භාවනා ක්‍රම වලින් කියවෙන අභ්‍යන්තර සමබරතාවයත් එක්කමයි.
මේ චිත්‍රපටිය ඇත්තටම මේ අත්දැකීමට මුහුණ දීපු Elizabeth Gilbert විසින් රචිත Eat Pray Love පොත ඇසුරින් නිමැවුණ චිත්‍රපටියක්. පොතත් බොහොම අපූරුයි කියල කීප දෙනෙක්ම කියල තිබුණ. කොහොමත් චිත්‍රපටිය විතරක් වුණත් අපූරු අත්දැකීමක්...
No comments:
Post a Comment