Adaptation චිත්‍රපටිය මුලින්ම මම බැලුවෙ අවුරුදු කීපයකට කලින් VCD තැටියකින්. නිකලස් කේජ්ට වහ වැටිල එයාගෙ චිත්‍රපටි හොයමින් බලපු කාලෙකදි තමයි CD කඩේකදි ඔය CD එක දැකල අරන් බැලුවේ. සිංහලෙන් තියා ඉංගිරිසියෙන්වත් සබ්ටයිටල් නොතිබුණ නිසා ඒ දවස්වල මට චිත්‍රපටිය ඒ තරම් තේරුණේ නෑ. කතාව නම් අමුතු එකක් කියල තේරුණා. මෑතකදි මම ආයෙත් චිත්‍රපටිය බාගත්ත. Nicolas Cage එක්ක මගේ තවත් ප්‍රියතම නිලියක් වෙන Meryl Streep දෙන්නම ඉන්න නිසා සහ මේ වතාවෙ මට ඉංගිරිසියෙන් සබ් එකක් හොයාගන්න පුළුවන් වුණ නිසා හොඳට චිත්‍රපටිය රසවිඳින්න පුළුවන් වුණා.
චිත්‍රපටියෙ ඉන්නෙ නිවුන් සහෝදරයො දෙන්නෙක්. ඒ Charlie Kaufman සහ Donald Kaufman. මේ චරිත ද්විත්වයම කරන්නෙ නිකලස් කේජ්. චරිත දෙක හාත්පසින්ම ස්වභාවයන් දෙකක්. ඒක කේජ්ගෙ සුපිරි රංගනයක්. මේ දෙන්නම චිත්‍රපටි තිර රචකයෝ. මේ දෙන්නගෙන් කතාව ප්‍රධාන වශයෙන් ගලාගෙන යන්නෙ චාලි කව්ෆ්මාන් වටේ තමයි. එයාට භාර වෙනව පොතකින් තිර පිටපතක් ලියන්න. The Orchid Thief කියන මේ පොතේ තියෙන්නෙ ඕකීඩ් වෙළෙන්දෙක්ගෙ ජීවිතේ ගැන කතාවක්. මේ කතාව තිර පිටපතකට ගේන්න චාලි සෑහෙන්න දුක් විඳිනව. මොකද ඔහුට ඒ පොතෙන් කිසිම කික් එකක් දැණෙන්නෙ නෑ. එයා හිතන්නෙ පොත ලියපු Susan Orlean කියන ලේඛිකාව අවංකව පොත නොලියපු නිසා ඔහුට පොත දැණෙන්නෙ නෑ කියලයි. ඔය අතරෙ සාමාන්‍ය විධියෙ action, crime වර්ගයේ කතාවක් ලියන ඔහුගේ සොහොයුරා කිසිම අපහසුවක් නැතිව බොහොම නිදහසේ තමන්ගෙ කතාව ලියන එක ගැනත් චාලිට ඉරිසියාවක් වගේ එකක් දැණෙනව. ඒ හැම එකකින්ම එයා පීඩනයට ලක් වෙලා ඉද්දි එයාගෙ ගෑණු ළමයත් එයාව දාල යනව. ඉතින් මේ හැමදේකින්ම මිදෙන්න ඕන නිසා අන්තිමේ චාලි තීරණය කරනව පොතේ කතුවරියව හම්බවෙන්න.
ඊට පස්සෙ වෙන්නෙ බොහොම අහඹු සිදුවීම් පෙලක්. කතාව නොහිතපු තැනකට ගිහින් උඩු යටිකුරු වෙලා ආයෙත් චාලිට සැනසීම උදාවෙන තැනකින් අවසන් වෙනවා. විශේෂම දේ තමයි මේ බොහොමයක් චරිත සැබෑ චරිත වීම. හැබැයි චාලි කව්ෆ්මන් සැබෑ චරිතයක් වුණාට ඔහුගේ සොයුරු ඩොනල්ඩ් ඔහු විසින් මවපු චරිතයක්.
චිත්‍රපටිය පුරාම තියෙන කතාවෙන් කියවෙන්නෙ පොතක් චිත්‍රපටියකට අනුවර්තනය කරන්න යද්දි ලේඛකයට දැණෙන දේ තමයි. කේජ්ගෙ රඟපෑම් ප්‍රිය කරන ඕනම කෙනෙක් කැමති වෙයි.
No comments:
Post a Comment